मुम्बई — बलिउडका चर्चित अभिनेता तथा कमेडियन सतीश शाहको शनिबार दिउँसो २:३० बजे मुम्बईको हिन्दुजा अस्पतालमा निधन भएको छ। उनी ७४ वर्षका थिए।
उनका म्यानेजरका अनुसार, शाहको पार्थिव शरीर अस्पतालमै राखिएको छ र आइतबार अन्तिम संस्कार गरिने तयारी भइरहेको छ।
सतीश लामो समयदेखि मिर्गौला सम्बन्धी समस्याबाट पीडित थिए। हालसालै मिर्गौला प्रत्यारोपण गराए पनि उनी पूर्ण रूपमा निको भएर करिब डेढ महिनाअघि फर्किएका थिए। तर शनिबार अचानक खाना खाएपछि ढलेका थिए।
कमेडियन जोनी लिभरले सतीशको निधनप्रति दुःख व्यक्त गर्दै उनको स्वास्थ्य अवस्थाबारे जानकारी दिएका छन्।
सतीश शाहले ‘साराभाई भर्सेस साराभाई’ र ‘जाने भी दो यारो’ जस्ता टिभी शोबाट ठूलो लोकप्रियता कमाएका थिए।
बलिउड फिल्ममा पनि उनको अभिनय चर्चित रह्यो — ‘मै हुँ ना’, ‘कल हो ना हो’, ‘फना’, र ‘ओम शान्ति ओम’ जस्ता सफल फिल्महरूमा उनले अभिनय गरेका थिए।
गुजरातको मांडवीमा जन्मेका शाहले पुणेको फिल्म एन्ड टेलिभिजन इन्स्टिच्युट अफ इन्डियाबाट अध्ययन गरेका थिए।
उनको करियर सन् १९७० मा बलिउड फिल्म ‘भगवान परशुराम’ बाट सुरु भएको थियो।
टिभीमा भने उनले सन् १९८४ को शो ‘ये जो है जिन्दगी’ बाट डेब्यु गरेका थिए, जहाँ उनले ५५ एपिसोडमा ५५ फरक–फरक भूमिका निभाएका थिए।
सतीश शाहको निधनले बलिउड र टिभी क्षेत्रमा एक महत्वपूर्ण व्यक्तित्वको क्षति भएको मानिएको छ।
